MECAE entrega sertifikadu investidor

Ministru Estadu, Koordenador ba Asuntu Ekonómiku (MECAE) no Ministru Agrikultura no Peska, (MAP), Eng. Estanislau Aleixo da Silva, entrega sertifikadu investidor ba empreza hat (timoroan nain rua no internasinonal nain rua) ne’ebé hakarak investe iha Timor-Leste, iha loron 21 fulan Maiu 2017, iha Sentru Konvensaun Dili (CCD).

Ajensia Promosaun Investimentu no Esportasaun Timor-Leste, I.P (TradeInvest), ne’ebé tutela ba MECAE, mak emite sertifikadu investidor tuir Lei no. 14/2011 ne’ebe estabelese regime Investimentu Privadu. Empreza hirak ne’ebe simu sertifikadu investidor bele hetan insentivu fiskal no aduaneiru iha tinan 5 (lima) nia laran se investe iha Munisipiu Dili no Baucau; tinan 8 (hualo) se investe iha Munisipiu sanulo sira seluk; no tinan 10 (sanulu) se investe iha Zona Espesial Ekonomia Sosial Merkadu (ZEEMS) Oe-cussi Ambeno no iha Atauro. Alende ne’e, empresa bele mos aluga rai Estadu nian ba tinan 50 nian laran, no bele prolonga ba tan tinan 50.

To’o agora entrega tiha ona sertifikadu investidor 190, 63 ba timoroan no 127 ba internasional sira.

Entrega sertifikadu investidor halo parte eventu ida ho tema “Diversifikasaun Ekonomika iha era Objetivu Dezenvolvimentu Sustentavel”, halo parte iha Konferensia Global konaba Ajenda 2030, hala’o iha loron 22 no 23 fulan Maiu iha Dili, no fo sai mos “Guia Investimentu” dauluk, inisiativa ida husi TradeInvest Timor-Leste.

Hala’o mos esposisaun ida ne’ebe iha oportunidade atu bele hala’o investimentu iha Timor-Leste no atividade setor privadu nian. Diversifikasaun Ekonomika prioridade ida VI Governu nian atu atrai investimentu privadu no kria empregu seguru iha rai laran.