Governu Parseria ho Setor Privadu ba Diversifikasaun Ekonomia Hodi Atinji Meta Dezenvolvimentu Sustentatavel

 Governo hakarak reduz dependensia rai nian ba reseita minarai no gas. Tan ne’e mak hala’o hela reforma ekonomika atu diversifika ekonomia, atrai investimentu privadu no kria empregu sustentavel. Ho ida ne’e mak Timor bele atinji Objektivu Dezenvolvimentu Sustentavel no17, liu husi parseria ho setor privadu. Mensajem ne’e mak Ministru Estadu, Koordenador ba Asuntu Ekonomiku (MECAE), Eng. Estanislau Aleixo da Silva hato’o iha sesaun konaba parseria efetivu ba ajenda 2030 “labele husik ema ida ba kotuk” (leaving no one behind), iha quadru Konferensia Global hala’o iha loron 22 no 23 fulan Maiu 2017, iha Sentru Konvensaun Dili.

Tuir Ministru Estanislau da Silva, “parseria bele ajuda nasaun sai forte liu tan, atrai investimentu privadu, dezenvolve ekonomia no hadia povu nia moris”. Ministru Estadu dehan mos katak “laos sustentavel depende deit ba setor minarai no gas, tan ne’e mak tenki diversifika ekonomia”. No fo ezemplu parseria hala’o husi Governu ho Kamara Komersiu Industria Timor-Leste (CCI-TL) reprezenta setor privadu, Asosiasaun Kafe Timor-Leste (ACTL), Pelican Paradise, TL Cement, kompania Xina nian Hong Lung Fisheries, iha area peska, no parseria sira seluk ne’ebe hala’o hela.

Iha parseria ho setor privadu, Governu liu husi MECAE promove hela revizaun no atualiza lejislasaun hanesan Lei Investimentu Privadu, Parlamentu Nasional aprova foin lalais ne’e, tamba “tenki hadia ambiente negosiu, atu atrai investimentu privadu no kria empregu”, katak Ministru Estadu Estanislau da Silva.

Alende de setor privadu, Ministru mos rekonhese inisiativa Governu nian ho apoiu parseiru dezenvolvimentu sira nian. “Ami iha parseria efetivu ho Banku Asiatiku Dezenvolvimentu (ADB), ho Sistema Nações Unidas nian (UNDP, OIT, FAO, PAM), ho Australian Aid, New Zealand Aid, Asia Foundation, JICA husi Japão, USAID, no seluk tan, ba asaun barak ne’ebe hala’o hela.

Partisipa iha sesaun konaba parseria efetivu reprezentante Governu Suécia no Serra Leoa nian, emprezariu no investidor sira, ema nivel a’as no tekniku sira Nações Unidas nian, akademiku, sosiedade sivil no setor privadu, hanesan mos Membru Governu Timor-Leste nian no reprezentante Administrasaun Publika nian.