Diversifika Ekonomia iha Setor Peskas ba Dezenvolvimentu Sustentavel

Iha loron 23 fulan Maiu 2017, Sua Exselensia Ministru Estadu, Koordenador ba Asuntu Ekonomiku no Ministru Agrikultura no Peskas (MECAE-MAP), Eng. Estanislau da Silva partisipa hanesan orador iha debate ida konaba Peska Sustentavel iha “Konferénsia Globál ajenda 2030: Dalan ba Meta Dezenvolvimentu Sustentavel iha nasaun nebe frajil no afetadu ba konflitu”, iha Sentru Konvensaun Dili.

Ministru Estanislau Aleixo da Silva dehan katak Timor-Leste riku ho biodiversidade tasi nian ne’ebe presija proteze husi poluisaun no peska ilegal, entretantu persija mos dezenvolve no diversifica ekonomia hodi hadia moris timoroan sira nian.

Tuir S.E. MECAE/MAP, area importante ida ba diversifikasaun ekonomika rai nian mak Setor Peska. Fo hanoin katak Governu fo ona lisensa ba kompañia peskas internasional sira hodi mai investe iha Timor. “Ita iha zona ekonomiku esklusivu ba atividade peska hamutuk 72, no ita fo ona lisensa ba kompania peskas sira hamutuk 18”, katak Ministru Estanislau da Silva.

Maibe, antes Governu fo lisensa ba kompañia peskas hirak ne’e, Governu liu husi Ministeriu Agrikultura no Peska, halo uluk avaliasaun ba kompañia sira. “Kompañia hirak ne’e persija fornese sira nia profile no rejistu atividade (logbook). Ami mos buka hatene sira halo peskas iha ne’ebe ona no kontaku ho nasaun sira seluk hanesan Indonesia, Australia no Papua Nova Guiné” dehan Ministru Estanislau da Silva. Ministru fo hatene mos katak Prosesu avaliasaun hetan apoiu mos husi Australia, “Australia ajuda ita hodi haruka sira nia tekniku espesialista mai Timor-Leste hodi revista ba kada ro’o idak-idak ho sira nia rede peskas”. Wainhira remata inspesaun, Governu bele fo ona lisensa hodi ro’o hirak ne’e bele halo peska iha tasi Timor liliu iha tasi kosta sul. “Ami so fo deit lisensa ba sira hodi halo peska iha kosta sul no la fo iha kosta norte, tamba tuir espesialista sira, kosta norte mak iha riku biodiversidade marinha ida ne’ebe mos boot iha mundu” dehan Ministru Estanislau. Maske fo lisensa halo peskas, Governu mos iha politika no regulamentu ne’ebe kompañia peska sira persija halo tuir. “Ba se deit mak halo peska iha ita nia tasi, persiza tuir ita nia regulamentu. Se la tuir ita nia regulamentu, ami sei aplika multa, hapara lisensa no haruka sira fila ba sira nia rain” katak Ministru.

Entretantu, peska ilegal sai mos hanesan problema ne’ebe sempre infreta iha Timor-Leste. Sei iha ro’o ilegal balun mak tama mai tasi Timor la ho lisensa no halo peska ilegal iha tasi Timor “Maibe peska ilegal hahu menus ona, tamba ami iha rekursu no equipamentu ne’ebe fo husi Ajensia Kooperasaun Internasional Japão nian (JICA) ou husi Governu Japão hodi detekta ro’o ilegal ne’ebe tama iha tasi Timor” dehan Ministru Estanislau da Silva. Aliende ne’e, MAP mos asina akordu ho Governu Indonesia iha loron 29 fulan Agostu 2015 hodi servisu hamutuk ajuda tau matan ba ro’o ilegal ne’ebe tama mai Timor.

Aliende aprezentasaun MECAE-MAP nian iha sesaun konaba Peska Sustentavel, orador sira seluk mos hato’o sira nia aprezentasaun kona ba oinsa atu konserva no uza rekursu iha tasi laran ba dezenvolvimentu ne’ebe sustentavel. Vise Ministru Finansas no Dezenvolvimentu Ekonomiku Serra Leoa nian, Momoh Vandi, aprezenta konaba Diversifikasaun Ekonomiku no Ekonomia Azul. Ministru Komersiu, Industria no Ambiente Timor nian, Constâncio Pinto, koalia konaba mudansa klimatika no impaktu ba tasi, no Dra. Sandra Whitehouse, perita konservasaun tasi nian aprezenta konaba poluisaun no konservasaun tasi nian.

Refere ba asuntu ne’e, Ministru Estanislau Aleixo da Silva mos sei ba partisipa iha Konferensia dauluk konaba Oseano, ne’ebe organiza husi Nações Unidas. Tema Konferensia ne’e mak “Ita nia Oseano, Ita nia Futuru: Parseria ba Implementa Objetivu Dezenvolvimentu Sustentavel 14″.

Konferensia ne’e sei hala’o husi loron 5 to’o 9 fulan Junhu iha Nova Iorque, Estados Unidos America, ne’ebe sei diskuti no apoia konservasaun no utilizasaun sustentavel oseano, tasi no rekursu tasi nian.