KM fo autorizasaun ba Memorandu konaba Rejime Komersiu Eksternu iha vigor

foto_Easy-Resize.com

Iha sesaun loron 13 Junhu 2017, Konsellu Ministru (KM) fo autorizasaun ba Ministru Estadu, Koordenadór Asuntu Ekonómiku no Ministru Agrikultura no Peska, Eng. Estanislau Aleixo daSilva, atu submete ofisialmente ba Diretor Geral Organizasaun Mundial Komersiu (OMC). dokumentu Memorandu konaba Rejime Komersiu Eksternu iha vigor iha Timor-Leste (MFTR sigla iha lian ingles), ho ne’e bele hahu ona negosiasaun adesaun Timor-Leste nian ba organizasaun multilateral komersiu mundial ne’e.

MFTR koalia konaba situasaun ohin loron komersiu eksternu Timor-Leste nian, tuir padraun OMC. Memorandu ne’e demonstra mos vontade politika Governu nian atu implementa reforma, no fo hatene reforma no medida internu hirak ne’ebe hala’o hela iha rai laran konaba komersiu eksternu.

Dokumentu ne’ebe aprova iha kapitulu 8 (hualu), anexu 42 (ha’atnulu resin rua) no pajina 124 (atus ida ruanulu resin ha’at), no aprezenta dadus politika, juridiku, ekonomiku, aduaneiru no fiskal Timor-Leste nian, bazeia ba lejislasaun.

Iha fulan Abril tinan 2015, Timor-Leste halo pedidu formal adesaun ba OMC. Iha fulan Dezembru tinan 2016, Konsellu Jeral organizasaun nian fo estatutu observador ba Timor-Leste, bazeia ba “Deklarasaun konaba Rejime Komersiu Eksternu iha vigor” no kria Grupu Traballu atu ezamina pedidu adesaun ne’e. Sekretariadu OMC nian husu ba Governu Timor-Leste atu submete MFTR ida atu hahu negosiasaun formal, no ne’e sei halo agora hafoin autorização husi Konsellu Ministru.