Business Forum iha Darwin Promove Oportunidade Investimentu

2

Iha loron 16 Junho 2017, instituisaun Governu ba promosaun investimentu no exportasaun, TradeInvest Timor-Leste (TITL) hala’o Business Forum ba dala-uluk, iha Darwin, Australia, ho objektivu hodi promove oportunidade investimentu iha Timor-Leste.

Sua Exselensia Ministru Estadu Koordenador ba Asuntu Ekonomiku (MECAE), Eng. Estanislau Aleixo da Silva iha nia diskursu hatete katak “dadaun ne’e Timor-Leste enkoraza dezenvolvimentu negosiu iha setores ekonomia lima ne’ebe sai hanesan potensial bo’ot iha Timor-Leste; minarai no gas, agrikultura, peska, turizmu, no industria manufaktureira”, hanesan mos industria mineira. Iha oportunidade hanesan, Sua Exselensia MECAE mos konvida investidor sira mai investe iha setores hirak ne’ebe mensiona tiha ona iha leten. “Timor-Leste orgulhu no prontu ba negosiu no komersiu. Mai Timor-Leste no investe iha setor hirak ne’ebe imi hakarak”.

Business Forum marka mos prezensa husi Sua Exselensia Chefi Governu Territoriu Norte, Sr. Michael Gunner MLA. Sua Exselensia ne’e hateten katak “Governu Territoriu Norte iha komitmentu a’as tebes hodi servisu hamutuk dezenvolve Timor-Leste no sei haforsa relasaun entre nasaun rua”. Sua Exselensia mos dehan katak relasaun entre rai rua ne’e la’os iha parte negosiu deit maibe mos tanba rai rua ne’e iha historia naruk durante funu kontra segunda guerra mundial.

Iha oportunidade ne’e, TradeInvest Timor-Leste mos lori emprezariu lokal/nasional partisipa iha eventu ne’e hodi bele habelar sira nia koneksaun ho seitor privadu iha Australia.

Forum ne’e hetan prezensa husi partisipante liu 130. Alende prezensa Sua Exselensia MECAE no Chefe Governu Territoriu Norte Australia, partisipa mos Sua Exselensia Ministra Turizmu, Arte no Kultura interina, Sra. Isabel Ximenes, Embaixador Australia ba Timor-Leste, Peter Doyle, no emprezariu Timor-Leste no Australia nian.

Forum ne’e hetan mos kobertura husi ABC News Australia. Bele hare noticias iha link ne’e; https://youtu.be/JCgxCO2vZ-Y