Diskusaun Nasional Meja Redonda entre Setor Publiku no Setor Privadu

Iha loron 14 Jullu 2017, hala’o Diskusaun Nasional Datoluk Meja Redonda entre Setor Publiku no Setor Privadu konaba “Asesu ba Kreditu”, iha sala Suai, Timor Plaza, Dili.

Setor Privadu nudar parseiru dezenvolvimentu Setor Publiku, iha papel importante atu kontribui ba dezenvolvimentu ekonomia Timor-Leste nian. Tamba ne’e persija iha dialogu ne’ebe regular entre setor rua ne’e hodi bele solusiona obstaklos no dezafius e mos hare oportunidade ne’ebe Timor-Leste iha, hodi bele diversifica ekonomia rai laran.

Ministru Estadu, Koordenador ba Asuntu Ekonomia no Ministru Agrikultura no Peska (MECAE-MAP), Eng. Estanislau Aleixo da Silva, maka preside eventu ida ne’e, ne’ebe partisipa mos Primeiru Ministru (PM) em exersisiu, Dr. Agio Pereira, no Vice-Ministru Finansas, Hélder Lopes.

Ministru Estanislau Aleixo da Silva, dehan katak “Diskusaun Nasional Datoluk Meja Redonda entre Setor Publiku no Setor Privadu hala’o ho nia objektivu fundamental mak atu promove setor privadu no mos atu apresenta buat balun ne’ebe Governu konsege implementa ona ba apoiu Setor Privadu”.

“Durante ne’e Governu no Setor Privadu iha parseira ne’ebe diak, no importante tebes iha parseria diak ho Setor Privadu hodi nune’e bele asegura dezenvolvimentu ne’ebe sustentavel”. Sua Exselensia MECAE mos husu atu Governu foun mai persija kontinua servisu ba dezenvolve no apoiu Setor Privadu”.

Diskusaun Nasional Datoluk Meja Redonda entre Setor Publiku no Setor Privadu organiza husi Unidade Setor Privadu MECAE ho apoiu Kamara Komersiu, Industria Timor-Leste (CCI-TL), ne’ebe partisipa mos membru Governu no Parlamentu Nasional, empresariu sira no sosiedade sivil.