Lansamentu Estratejia Nasional Empregu

Iha loron 17 fulan jullu 2017, Governu, liu husi Sekretariu Estadu ba Politika Formasaun Professional no Empregu (SEPFOPE), ho apoiu Gabinete Ministru Estadu, Koordenador ba Asuntu Ekonomia (MECAE) no Organizasaun Mundial ba Trabalho (International Labour Organization /ILO) halo lansamentu ba programa Estratejia Nasional Empregu (ENE) ba periodu 2017 – 2030, iha salaun Suai, Timor-Plaza, Dili.

Sua Exselensia Ministru Estadu Koordenador ba Asuntu Ekonomiku iha nia intervensaun hateten katak “empregu sai hanesan kestaun importante ida ne’ebe ita hotu persija resolve. Tamba ne’e, MECAE koordena ho SEPFOPE no hetan apoiu husi ILO dezenvolve estratejia ne’e no husu atu Governu foun sei kontinua implementa estratejia ne’e”.

Sekretariu Estadu ba Politika Formasaun Professional no Empregu, Sr. Ilidio Ximenes da Costa hato’o katak “ho realizasaun, implementasaun no komitmentu liu husi lansamentu ba Programa ENE iha loron ohin Segunda 17 Julho 2017, Governo ho nia kbi’it persistensia tomak sei hahu kria kondisaun ho hanoin innovativu foun hodi bele kontinua fasilita oportunidade empregu foun no ha’metin diak liu tan oportunidade empregu nebe existe ona ba Timor oan”.

Objetivu fundamentu husi programa Estratejia Nasional Empregu 2017-2030 maka atu kria oportunidade empregu ba foinsae Timor oan sira nebe nia idade konsidera pronto ona atu tama ba iha merkadu trabalho hodi buka serbisu no atu ha’metin liu tan mos kampo empregu hirak nebe existe ona ba foin sae no Timor oan sira ne’ebe hetan ona serbisu iha merkado trabalho, hodi nune’e bele ha’menus numeru dezempregu iha Timor-Leste laran no mos tulun ha’kbi’it produtividade no kresimentu ekonomia Timor Leste ninian.

Atu realiza objetivu ida ne’e, Programa estratejia ENE ne’e rasik define ona pilares 3 ne’ebe persija implementa Pilares tolu nebe refere mak hanesan haktuir mai ne’e: 1o hasa’e demanda ba merkado trabalhu liu husi promove empregu ne’e be kria husi setor privadu, hasae empregu migrasaun laboral, masimiza impaktu ba despeza publika iha empregu no dezenvolve potensialidade lokal.

2o hametin oferta ba merkadu trabalhu liu husi dezenvolve rekursu umanu, kontinua implementa Planu ba programa Edukasaun no Formasaun Teknika Profisional Timor-Leste nian (TVET 2011-2030), kria ligasaun linha Ministerial nebe forte entre Ministeriu Edukasaun (ME) ho SEPFOPE, ha’metin no ha’buras programa sentru formasaun sira, hametin programa Ensinu Superior sira, hadia sistema protesaun sosial no promove igualdade jeneru.

3o hametin instituisaun sira ne’ebe iha relasaun serbsiu ho merkadu trabalhu. Atu hametin instituisaun sira ne’e, persija hametin politika ativa iha merkadu de trabalhu, hametin estrutura linha koordenasaun Ministerial sira ninian, hametin Sistema Informasaun Merkadu Trabalhu (SIMT), hadia ligasaun entre prokura do empregu ka sistema buka serbisu nian ho oportunidade demande de empregu no reve’e hikas fali lei traballu no mekanismu fixa salariu ne’ebe uza iha Timor-Leste.

ENE ne’e aprova ona husi Konselhu Ministru iha loron 13 Junhu 2017. Iha futuru sei kria grupu interministerial hodi define didiak no implementa meta sira ne’ebe sei atinji iha 2030.