Aprezentasaun “Esbozu Regulamentu Sistema Garantia de-Kreditu iha Timor-Leste”

DSC_0270_Easy-Resize.com

Iha loron 28 Jullu 2017, Banku Sentral Timor-Leste (BSTL), aprezenta “Esbozu Regulamentu Sistema Garantia de-Kreditu iha Timor-Leste” iha hotel Novo Turizmu, Dili. Eventu ne’e marka mos prezensa Ministru Estadu Koordenador ba Asuntu Ekonomiku (MECAE), Eng. Estanislau Aleixo da Silva.

Sua Exselensia MECAE iha nia intervensaun hateten katak “Sistema Garantia Kreditu hanesan solusaun ida ne’ebe Governu no Banku Sentral fornese hodi apoiu no promove setor privadu sira asesu ba kreditu, liu-liu ba empreza ki’ik no medium sira”

Sua Exselensia mos hatutan tan katak Setor Privadu iha papel importante ba desenvolvimentu ekonomia. Tamba ne’e Governu persija fo apoiu ba setor privadu hodi halo investimentu no diversifika potensial ekonomia rai laran mak hanesan; agrikultura, peskas, turizmu, industria manufaktureira inklui mos industria mineira.

Governador BSTL, Sr. Abrão Vasconselos hateten katak “objetivu husi Sistema Garantia Kreditu ne’e mak hakarak atu fo apoiu ba emprezariu ki’ik no mediu sira hodi asesu ba kreditu, tamba sira mak dala barak hasoru difikuldade ba asesu kreditu husi banku ho razaun sira la iha istoria finanseira, la iha esperensia ba negosiu (foin mak hahu) no la iha posibilidade atu hatudu garantia ri’il ruma”.

Governu liu husi Banku Sentral hakarak fo apoiu ba emprezariu ki’ik no mediu sira hodi asesu kreditu liu husi mekanismu fahe todan (partilla) ba risku ruma ho banku komersial sira ho montante masimu 70%, karik emprezariu sira la kumpri sira nia obrigasaun ba banku komersial sira.

Sistema Garantia Kreditu ne’e sei jere no implementa husi BSTL no aprova ona husi Konsellu Ministru iha loron 30 Maiu 2017 no sei hein promulgasaun husi Presidente.