Lansamentu Kompetizasaun Kualidade Kafé Timor-Leste 2017

Iha loron 4 Agustu 2017, Asosiasaun Kafé Timor-Leste (ACTL) halo lansamentu Kompetizasaun Kualidade Kafé 2017 ho objektivu atu fo oportunidade ba produtores kafe sira iha munisipio amostra ou hatudu sira nia produtu kafe. Lansamentu marka mos prezensa Sua Exselensia Ministru Estadu Koordenador ba Asuntu Ekonomiku (MECAE) no Ministru Agrikultura no Peskas (MAP), Eng. Estanislau Aleixo da Silva.

Sua Exselensia MECAE iha nia intervensaun hateten katak “Kafe hanesan setor ida ne’ebe importante ba ekonomia Timor-Leste, tamba ne’e presiza iha planu diak ba dezenvolve plantasaun kafe inklui mos promove kafe no buka merkadu ba produtores kafe sira hodi faan”. Sua Exselensia salienta tan katak, ba dezenvolvimentu plantasaun kafe, Governu liu husi MAP halo ona rehabilitasaun ba plantasaun kafe iha munisipiu Ainaro, Aileu, Ermera, Liquisa no Manufahi.

SE MECAE-MAP mos rekonhese katak atividades hirak ne’e bele realiza tamba iha servisu parseria ne’ebe diak entre Governu, ACTL no parseiru dezenvolvimentu sira hanesan Asian Development Bank (ADB), Market Development Facility (MDF) no Timor Global.

Presidente ACTL, Sr. Evangelino Monteiro Soares hateten katak “ACTL hala’o ona atividade barak ba promove setor kafe.  Kompetizasaun Kualidade Kafe hanesan mos parte ida husi atividades seluk hodi promove setor kafe”. Alende ne’e, ACTL mos hala’o atividade seluk hanesan festival kafe, roadshow kafe ba munisipius, konferensia internasional no mos partisipa iha expo kafe iha nasaun Asia nian.

Lansamentu kompetizasaun Kafe hanesan inisiu husi segundu festival kafe Timor-Leste ne’ebe sei hala’o iha fulan Outubru 2017.