Vizita postu administrativu Fatuberliu

Iha loron 10 fulan Agostu, Ministru Estadum Koordenador ba Asuntu Ekonomiku, no Ministru Agrikultura no Peska, Eng. Estanislau Aleixo da Silva, akompaña husi  Diretor Jeral Peska, Acacio Guterres no Diretora Nasional Veterinaria, Sra. Joanita Bendita da Costa, visita suku Clacuc no Fatu Cahe, postu administrativu Fatuberliu, Munisipiu Manufahi.

Objektivu husi inisiativa ne’e maka atu ba vizita fatin ne’ebe sei halo konstrusaun ba kolan atu hakiak ikan Tilápia. Rai hektar 20 komunidade lokal sira maka fo ba Ministeriu Agrikultura no Peska hodi halo investimentu ida ne’e.

Ministru Estanislau Aleixo da Silva agradese comunidade suku Clacuc no Fatu Cahe nian ne’ebe oferece ona sira nia rai no fo hatene katak “iha ona orsamentu hodi sosa ona eskavadora foun rua ho kondisaun diak atu bele kee kolan hodi hakiak ikan”.

Iha suku Clacu, Ministru Estanislau da Silva ba vizita mos grupu rua simu apoiu subvensaun publiku husi Gabinete MECAE. Grupu rua ne’e maka: Jerasaun Foun Nalolo Tiro (JERFONT) hakiak karau no simu apoiu hamutuk $3.550.00, no grupu Talioan iha área panifikasaun (halo paun) ne’ebe simu apoiu hamutuk $1.414.00.

“Hau  orgullu tebes o servisu grupu rua ne’e hala’o, mesak joven deit ho iniciativa atu hadia ekonomia familia no hamenus dezempregu. Mesmo ho orsamentu ki’ik sira jere ho diak tebes”, dehan Ministru.

Atu habelar liu tan sira nia atividade, Ministru husu ba grupu rua ne’e atu hatama sira nian proposta atu bele asesu ba creditu iha Banku Nasional Komersiu Timor-Leste (BNCTL) ho juru ki’ik husi 6%.