Ministru Estanislau koilleta ikan no vizita kolan boek

Ministru Ministru Estadu, Koordenador Asuntu Ekonomiku (MECAE) no Ministru Agrikultura no Peska (MAP), Eng. Estanislau Aleixo da Silva, simbolimente lansa koilleta ikan ne’ebe kria husi grupu Anin Haburas An Rasik (AHAR), iha postu administrativu Fauberliu, Munisipiu Manufahi, iha loron 11 fulan Agostu.

Iha oportunidade ne’e, Ministru Estanislau Aleixo da Silva, husu ba Governu foun atu servisu hamutuk ho Komunidade agrikultor Fatuberliu sira nian hodi dezenvolve Fatuberliu sai nudar sentru kriasaun ikan Tilapia.

“Ami nia planu ba futuru postu administrativu Fatuberliu atu sai hanesan fatin kriasaun ikan Tilapia. Ne’e hanesan meiu ida atu hamenus importasaun ikan husi liur”, dehan Ministru Estanislau da Silva.

Iha loron hanesan, MECAE-MAP mos halo lansamentu ikan Tilapia ba kolan, iha suku Kula Kau, postu administrativu Alas, no vizita mos kriasaun boek iha suku Abio, postu administrativu Natarbora.