MAP Realiza Workshop ba Perparasaun Planu Dezenvolvimentu Nasional Setor Kafe

Ministeriu Agrikultura no Peskas (MAP) realiza workshop “Inisiasaun ba Perparasaun Planu Dezenvolvimentu Nasional ba Setor Kafe” durante loron rua (14 no 15 Setembru, 2017) iha sala reuniaun MAP, Comoro, Dili, ho objektivu atu bolu parte interesantes hotu hanesan produtores café, ajensia governo nian, parseirus dezenvolvimentu, sosiadade sivil no setor privadu hodi fahe visaun no hanoin hamutuk ba planu dezenvolvimentu setor ne’e.

Sua Exselensia Ministru Estadu Koordenador ba Asuntu Ekonomi (MECAE) no Ministru Agrikultura no Peskas (MAP), Eng. Estanislau Aleixo da Silva iha abertura workshop, hateten katak “kafe hanesan setor importante ida, aliende minarai no gas, no sai hanesan produtu importante ida ba exportasaun, tamba ne’e persija halo planu didiak ba dezenvolvimentu setor ne’e.”

Sua Exselensia mos aprezenta tan katak kafe sai hanesan area prioritaria ida ba VI Governu konstitusional, nune’e Governu liu husi MAP halo ona esforu balun hanesan  rehabilitasaun no ekspansaun “ita halo rehabilitasaun ba kafe hamutuk 500 hektares ona” katak SE. MECAE/MAP.

MAP ho koordenasaun husi gabinete MECAE servisu hamutuk ho Asosiasaun Café Timor-Leste (ACTL), Banku Dezenvolvimentu Aziatiku (Asia Development Bank/ ADB) no Instituisaun Kualidade Kafe ba dezenvolvimentu no promosaun setor ne’e, nune’e kafe Timor-Leste bele esporta ba merkadu internasional ho kualidade diak.